Venezuela-ah dawr neitute man an ni

Venezuela sorkar chuan an ram khawpui, Caracas supermarket-a man tlawma bungraw hralh chhuaktu dawrin thil lei tumte thui tak taka a intlar tir avangin dawr neitute a man.

Venezuela President Nicolas Maduro chuan dawr neitute hian an hnathawkte nasa takin an titlem a, hei vang hian anmahni dawr tumte'n harsatna tawkin, thui taka intlar a ngaih phah a ni, a ti. Mipuite tana harsatna an siam vangin dawr neitute hi koin man an ni tih a sawi.

Venezuela ramah hian ei tur a vâng a, hei bakah hian thil man a sang chak hle bawk. Kar hmasa khan eptute chuan sorkar laka lungawi lohna lantirin kawng an lo zawh tawh a ni.

President Maduro chuan sumdawng zinga tam tak chuan a kaihhruai sorkar paihthlak tuma eptu pawlte an thawhpui niin a sawi. Supermarket chain pali chu bungruate chheprelh a, ram pawn lama tawlhruah a puh bawk.

Oil producer lian, Venezuela hian international market-a oil man tla hniam a tuar nasa hle a, sum lamah harsatna a tawk mek a ni. Kum 2014 kumtir lama Venezuela GDP tlakhniamna hi 2.3% a tling hman a ni.