Jordan-in a pilot chhanchhuah ngei a tum
Jordan chuan Islamic State (IS) firfiak kuta tang mek, Jordanian pilot Lt Moaz al-Kasasbeh chu chhanchhuah ngei a nih theihna atan theihtawp chhuaha hma lak a tum thu a sawi.
Lt Moaz al-Kasasbeh hi nikum December thlaa US kaihhruai ṭangrual pawlte'n IS laka beihpui an thlaknaa a tel ṭumin Syria ramah a thlawhtheihna a tla a, firfiakte'n an man zui ta a ni.
Jordan sorkar chuan Kasasbeh tlanchhuahna atan hian an rama tang mek, Iraq mi chhuah pawh a remti dawn tih a tarlang.
Sorkar thupuangtu, Mohammed al-Momeni chuan pilot hi a la dam ngei em tih hrechiang turin state organistation hrang hrangte a ṭul anga thawk turin a hriattir a, a la dam ngei a ni tih an hriat theih chuan tlanchhuah a nih theihna atan hma an la nghal dawn tih a sawi.
IS-te'n Japan journalist Kenji Goto an that chu Jordan sorkar chuan a dem takzet tih a sawi bawk a, Goto chhuah a nih theihna atan hian Japan sorkar chu theihtawpa a thawhpui thu a tarlang bawk. Firfiakten an man hnuah Kasasbeh chanchin hi hriat zui a ni ta lo a, a chhungte chuan a chanchin hrechiang thuai tur leh, an hriat angte pawh hrilh turin Jordan sorkar an ngen.