US president inthlanah Trump aiin Harris chak ring an tam zawk
US president thlanna neih tur a ngaihnawm zel a, Democrats lamin an presidential candidate la puang lo mah se Joe Biden aiawh tura ngaih, Kamala Harris chu Republican candidate Donald Trump aiin kumin kumtawpa inthlan neih turah a chak zawk ring an tam.
President thar thlannaa a tling tur zawk a mipui ngaihdan lakkhawmah Harris chu 44% in hnehna chang turin an ring a, Trump chu 42% in a tlin an ring ve bawk. He poll hi US president, Joe Biden-a president candidate a nihna aṭanga a inhnuhdawh hnua neih niin Biden-a'n Pathianniah a inhnuhdawk tih a puan hma kha chuan Trump hian poll-ah hma a hruai a ni. President thlan tura mipui ngaihdan lak hi US rampum huapa neih ni mah se US chhunga state ṭhenkhat, chak zawk tur a chian lohna state-a che ṭha tan hnehna chan theihna sang tak a awm a ni.
US mipui ngaihdan lakah hian voter zinga 56% chuan Harris hi harsatna hmachhawn turin a rilru a hriam ṭhat bakah chingfel turin theihna a nei niin an ngai. Biden kha chu vote thlak thei zinga 22% chauhin hetiang theihna nei angah an ngai thung. Democrats party chhunga mi pawimawhte thlawpna a dawng tawh Harris hi Thawhlehni khan Wisconsin-ah a campaign a ni.
Democrats aiawhin president inthlan chuh turin Kamala Harris hi ruat a la ni lo thung a, mahse a campaign team chuan delegate an mamawh zat an nei tawh niin an sawi a, August thlaa Democrats convention neih hunah Harris hi president inthlan chuh tura puan a nih ngei beisei a ni.
Harris-i'n indo titawp turin Israel PM a ngen dawn
US tlawha zin, Israel prime minister Benjamin Netanyahu leh US vice president Kamala Harris chuan tunkar hian White House-ah inkawmna hun an nei dawn a, he hunah hian Netanyahu chu Gaza indona titawpa, indona avanga Palestinian mipuite tawrhna titawp turin Harris chuan a ngen dawn.
Israel PM Netanyahu hian US Congress-ah a ṭum li na turin thu a sawi dawn a, he hunah hian vice president Kamala Harris hi Indianapolis-a zin tura ruahmanna siam lawk a awm tawh vangin a tel ve thei dawn lo a, mahse Netanyahu cham chhung hian White House-ah an inkawm dawn thung a ni. He hunah hian Gaza indona tawp tura a duhna Harris chuan a sawilan bei sei a ni. Harris hian indona tihtawp, mitang chhuah zalen, Palestinian civil mite tuarna tihtawp leh an zalenna neih let tir a duh thu Netanyahu sawipui dawn nia tarlan a ni. Hemi bakah hian inkahhai puang turin inremna an neih theih dan tur pawh a sawipui bawk ang.