Nepal-a thlawhtheihna chesualah mi 18 an thi

Nepal khawpui, Kathmandu-a Tribhuvan International Airport (TIA) aṭanga Saurya Airlines thlawtheihna thlawk chhuak tur chu nimin khan chesualin mi 18 an thi.

Thlawhtheihna hi Pokhara pana thlawk chhuak tur niin runway a zawh laiin a inher thut a, hemi hnu hian a kang zui a, kangmei chhuak hi ṭhelh mih tumin police leh kangṭhelhtute chuan hma an la nghal a ni. He thlawhtheihna chesuala dam chhuak awm chhun pilot hi damdawi-in lamah hruai nghal a ni. Tribhuvan International Airport hi chetsualna thlen hnu hian thuneitute chuan an khar nghal a, ramchhung leh pawn lama thlawk chhuak turte chu tih khawtlai a ngaih phah a ni.

Nepal-a thlawhtheihna chesualah hian mi 19 chuangin an zinga 18 chu an thi a, chetsualna thlenna hmun aṭang hian an ruang pawh lak chhuah a ni tawh. Thlawhtheihnaa a chuangte hi Saurya Airlines hnuaia thawktute vek an ni a, khualzin an phur lo nia tarlan a ni bawk.