SKorea president office hung chhungah NKorea balloon thawn chhuah a tla

North Korea chuan bawlhhlawh awmna balloon, South Korea lama an thawn chhuah chu chhunzawm zelin bawlhhlawh pai tel balloon hi nimin khan SKorea president office hung chhungah a tla.

South Korea rama thuthar thehdarhtute chuan balloon tla hian pawi a khawih lo niin an tarlang. SKorea Presidential security service chuan bawlhhlawh rawn tlaah hian thil hlauhawm a awm tel lo tih sawiin hliam tuar an awm lo tih an tarlang ve bawk. Hetih rual hian SKorea ramchhung hmun pawimawhah venhimnna uluk zawka kalpui a ngai tih a lang thung. NKorea hian mihring tana pawi thei thil an dah tel a nih chuan SKorea mipuite himna a derthawn theih avangin ramriah balloon hi kah thlak a ngai tih chu mithiamte ngaihdan a ni.

NKorea-in SKorea rama bawlhhlawh thawn a thar thawh leh chhan hi an ṭhenawm ramin ramriah aurinna hmanga K-pop hla leh thuchah a thehdarh ṭan leh vang a ni. NKorea hian thli thawt dan zawng hmang ṭangkaiin SKorea-ah hian bawlhhlawh awmna balloon hi a thawn chhuak ṭhin niin SKorea thuneitute chuan an sawi. Tun ṭuma president office hung chhunga balloon tla hian venhimna lama ṭan a ngaihzia lan tir mah se NKorea hian an duhna hmun taka balloon tlaktir turin thiamna a neih erawh SKorea thuneitute an ring lo.