Obama'n 2016 budget atan USD trillion 4 dah a rawt

US President Barack Obama chuan kum 2016 budget atan US dollar trillion 4 (tluklehdingawn sangli) dah a rawt. A rawt­na hi Congress-ah a thawn a, pawm a nih chuan US budget siam tawh zinga a tam ber ṭum a ni ang.

Budget rawtna a siam­ah, President Obama hian an rama middle-class te thuam chakna tura rua­hmanna siamin, infrastructure, education leh research lamah sum tam zawk dah a rawt.

2016 budget atana rawt, dollar tril­lion 3.999 hi kum hmasa lama budget aiin 6.4% zetin a tam a, sorkar sum indaihlohna pawh dollar tlulehdingawn 474 ah a tlahniam ang. Hei hi US Gross Domestic Product (GDP aṭangin 2.5% a ni.

October 1 aṭanga hman ṭan tur, budget thar atana rawtna a siamah, Obama chuan defence atana hman turin dollar tluklehdingawn 606 leh non-defence atan dollar tluklehdingawn 563 dah a rawt. Welfare expenditure atan dollar trillion 2.54 dah tum a ni a, hei hian social security, Medicare leh Medicaid-te a huam.

President Obama hian firm leh mi hausate hnen aṭanga chhiah lak ṭhin tihsan a rawt a, chhiah tihsan hian sum indaih lohna ṭhenkhat a phuhruk theih dawn bakah, infrastructure project fund atan hman a ni bawk ang. Mahse Congress hi Republican lam thuneihna a nih avangin President Obama rawtna hi an pawmsak lo maithei nia sawi a ni.

Republican lam chuan President Obama hi tax-and-spend policy chu sorkarin sum a hmanna lian ber, social security leh health program tidanglam chuang si loa policy hluia kir pui leh tumah an puh.