Egypt Court-in mi 183 thi turin an chungthu relsak

Egypt Court chuan dan pawna hnawl tawh, Muslim Brotherhood thlawptu mi 183-te chu thi turin an chungthu a relsak.

President hlui Mohammed Morsi-a party, Muslim Brotherhood thlawptute hian sipai chakna hmanga Morsi paihthlak a nih vanga lungawi lohna an lantirnaah, kum 2013 August thla khan Kardasa khuaa police station an bei a, police 16 thihnaah thiam loh chantir an ni.

Morsi paithlak a nih hnu hian amah thlawptute chuan sipai sorkar laka lungawi lohna lantir­in vawi tam tak nawrh an huaihawt a, sipai sorkar chuan Islamist pawl, Muslim Brotherhood-te lakah hian beihpui a thlak zui nghal bawk. Brotherhood member sang tel chu man niin thubuai siamsak an ni. Human rights group chuan sorkar thiltih dan hi na taka demin, eptu pawlte rahbeh tumah a puh.

Mi 183-te thi tura hremna pek an ni chu Amnesty International chuan sawiselin, Middle East and North Africa Programme Deputy Director Hassiba Hadji Sahraoui chuan, "He thutlukna hian Egypt criminal justice system-ah hleih neia rorel a nih zia a tilang a ni," a ti.