Liberia-ah Ebola vaccine chi hnih enchhin

Africa khawthlang lama hri leng mek, Ebola hri danna vaccine chi hnih chu Liberia ramah enchhin a ni.

Ebola hri danna hi US National Institutes of Health (NIH) bultumin zirchian a ni a, Thawhṭanni aṭang khan Liberia khawpui Monrovia-a vaccination center 10 ah enchhin a ni. Vaccine enchhinna atana inpe hi mi 27,000 an awm a, hengte hi kum 18 leh a chunglam, hrisel ṭha pangngaite an ni. Nakkum June thlaah zawhfel theih beisei a ni.

Vaccine enchhinna tura inpete hi damdawi hmanga chiu an nih hnu kar khatah staff-te'n an dinhmun an zirchiang leh ang a, hemi hnu hian thla tinin an taksa enfiah zui a ni ang. Vaccine an enchhinte hi a hlawhtlin ngei beisei a ni.

Ebola hri hi mi 22,000 chuangin an vei tawh a, a vei zinga mi 8,800 velin an thihpui tawh bawk.

Ebola hri danna hi a la awm lo a, enchhin mek niin, engmah pawm a la awm lo. Hri leng hian zia­awm lam a pan ṭan tawh niin Worth Health Organization chuan a sawi.