IS-in Jordanian pilot an hal hlum Jordan-in phuba lak nan Iraq mi 2 khaihlum ve nghal

Islamist State (IS) firfiakte chuan Jordanian pilot Muath al-Kasaesbeh chu bawm chhunga dahin an hal hlum a, nimin khan Jordan sorkar chuan IS thiltih avanga phuba lakna atan an rama tang mek, Iraq mi firfiak pahnihte a khaihlum ve nghal.

Thawhlehni khan IS hian an video thar an tichhuak a, hetah hian Kassabeh hi bawm chhungah a awm a, pawn lam aṭangin an hal hnan a ni.
Jordan sorkar chuan IS-te'n pilot an tihhlum lai video an tihchhuah hnuah, firfiakte chet dan rawng tak a dem thu leh, an thiltih chu rang taka chhan let a nih tur thu a sawi. Nimin zing khan Jordan sorkar chuan al-Qaida mi leh sa pahnihte chu a khaihlum nghal a ni. Khaihlum zinga pakhat hi IS-te'n a hmaa chhuah tura an lo phut tawh, Sajida al-Rishawi-i a ni. Rishawi-i hi kum 2005-a Amman-a hotel a ṭum thum bomb tihpuahnaah a tel a, bomb puak vang hian mi 60 in an thihphah a ni. A pawikhawihna avang hian thi turin a chungthu relsak a ni. Pakhat chu Ziyad Karboli a ni a, Iraq rama al-Qaida tana thawktu niin Jordan mi a thah avangin kum 2008 khan thi tura hremna pek a ni bawk.
IS chuan Rishawi-i khaihlum a nih avangin Jordan chu an bei chhunzawm leh dawn tih a sawi a, a ni an tihhlum vang hian Jordan chuan hnehna a chan phah dawn lo, a ti.
Jordan State TV chuan pilot tihhlum hun hi January 3 kha niin an sawi. He video hi IS media arm, Al-Urgan group twitter-ah dahchhuah a ni a, minute 22 awh niin a video hmingah hian 'Healing of the Believers' Chests' tiin an vuah.
IS hian Japan journalist a man tlanna atan Rishawi-i chhuah a phut a, Jordan leh Japan sorkarte nen inremna an siam theih loh avangin an mi man hi an tihlum a ni. A hnuah pilot tlanchhuahna atan hian an phut leh a, Jordan chuan pilot hi a la dam ngei a ni tih finfiahna pe phawt tura a tih avangin an inbe zui thei ta lo a ni.
Jordan hi US kaihhruaia ṭangrual pawlte'n Iraq leh Syria rama IS firfiakte laka beihpui an thlaknaah a tel.