Argentina President manna thupek siam tum

Argentina prosecutor Alberto Nisman chu an ram President Cristina Ferandez de Kirchner man theihna tur thupek siam a lo tum tih hriatchhuah a ni.

Prosecutor Nisman hi thla hmasa khan Buenos Aires-a a chenna inah thia hmuh a ni a, a lu-ah silaia kah a ni.

A thihdan hi chhui chian mek a ni a, investigator-te chuan amah a intihlum nge, midang kut tuara thi a ni tih an la sawi­ chiang lo. An chhuina kal zelah, investigator Viviana Fein chuan Nisman-a bawlhhlawh bawmah hian President Kir­chner manna thupek siamna tura a duan, draft warrant a hmuchhuak.

Nisman hian kum 1994-a Buenos Aires-a Jewish centre-a bomb tihpuah chungchang a chhui mek a, he bomb puak vang hian mi 85 an thi a ni. He pawikhawihnaah hian Nisman chuan President Fernandez chu Iran inrawlh dan thupbo tuma a puh chungchangah insawifiah turin a lo hriattir tawh a, President Fernandez insawifiah hma lawkin Nisman hi thia hmuh a ni.