Jordan Lal-in IS lakah indo a puang

Jordan lal, King Abdullah II chuan Jordanian pilot hal hlumtu, Islamic State (IS) firfiakte chu na taka chhanlet a tiam a, pilot chu a thlawn maia thih tir an tum lo tih sawiin, IS lakah indo a puang.

IS hian Thawhlehni khan Jordanian pilot, Moaz al-Kassasbeh chu bawm chhunga khunga an hal hlum lai video an tihchhuak a, hei vang hian King Abdullah hian US-a a cham hun pawh titawiin an ramah a kir nghal a, security hotute chu meeting a neihpui nghal.

Kassasbeh halhlum a nih avanga phuba lakna atan Jordan sorkar hian an rama al-Qaida mi tang mek pahnihte chu Nilaini zing khan a khaihlum ve nghal a, pakhat zawk hi IS-te'n a hmaa chhuah tura an lo phut tawh, Sajija al-Rishawi-i a ni.

Security hotute nena meeting an neih zawha thuthar lakhawmtute a kawmnaah, King Abdullah chuan, "Martar Moaz al-Kassasbeh-a thisen hi a thlawnin a luang dawn lo. A chunga thil thleng vanga Jordan leh a sipaite thil tih tur hi a nasa viau ang," a ti. IS chu hneh theih leh hneh ngei tur an ni tiin, Abdullah chuan tun hma zawng aiin Jordan chuan firfiakte beih let hi a tumruh tawh a ni, a ti.

Kasasbeh-a pa, Safi al-Kassasbeh pawhin Jordan sorkar chu phuba lakna atana mitangte tihhlum mai duhtawk lo turin a ngen a, IS te chu nuai chimit vek turin sorkar a ngen.

IS chetdan rawng tak hian Arab ramte a ti thinur zual hle a, Arab League secretary general Nabil al-Arabi chuan Kassasbeh thah a nih dan chu nunrawng thlak a tih thu leh mihringte rin phak bak a ni tiin, IS chu hri hlauhawm tak, danbeh ngei ngai an ni, a ti.

Arab chanchinbute chuan IS laka beihpui thlaknaah King Abdullah ngei hian hma a hruai mai thei tiin an tarlang. Amah hi trained pilot a ni a, an pilot Kassasbeh phuba lak a tumzia a sawinaah hian Clint Eastwood-a film, 'Unforgiven'-a a ṭawngkam hmante a sawichhuak hial a ni. He film-ah hian hremna pek a tum chung­changa Clint Eastwood-a thusawi, "Mi tupawh ka hmuh apiang chu ka that dawn a ni," tih leh, "Tupawh min lo beitu chu, amah chu ka that ringawt dawn lo a, a nupui leh a ṭhiante ka that vek ang a, a in pawh ka halsak bawk ang," tihte chu a sawichhawng a ni.

Hetihlai hian Jordan state TV chuan Kassasbeh hi tun hnaia tihhlum ni loin, January 3-a thah a nih thu a sawi. IS-te'n Rishawi-i nena inthleng tura Jordan sorkar a nawr lai pawh khan Kassasbeh hi a thi daih tawh niin a tarlang.