Bangladesh-a bus beihnaah mi 7 an thi
Bangladesh-a eptu pawlte'n nimin khan an ram khawchhak lamah khualzin phur bus chu petrol bomb hmangin an bei a, mi 7 an thi a, midang 15 in hliam an tuar. Thi zingah hian hmeichhia pahnih an tel.
Police-te chuan bus beitute hi Prime Minister hlui Khaleda Zia zuitute nia hriat an ni tih an sawi. He bus hi Cox'z Bazar aṭanga Dhaka pan tur a ni.
Bus hi Chauddagram khaw bula beih a nih lai hian passenger-te hi an muhil vek niin police-te chuan an sawi a, hliam tuar zinga panga-te chu an dinhmun a ṭha lo hle.
Bangladesh-ah hian eptu pawl, Khaleda Zia kaihhruaite chuan Prime Minister Sheikh Hasina chu inthlan ṭhat buatsaih tura phutin nawrh an huaihawt mek a, nawrh huaihawt laia tlanchhuak motor-te chu police emaw, sipaiin an veng zel a, mahse Chauddagram khaw bula bus beih hian security escort a nei lo.
Police hotu Uttam Chakrabarty chuan bus beih a nih kaihhnawihah thubuai pahnih an ziak lut nghal a, pawikhawihnaa inhnamhnawiha rinhlelh mi 56 hming tarlan a ni tih a sawi. Eptu hruaitu Khaleda Zia chu pawikhawihna thlennaah hian a bultumtu bera puh a ni bawk.