Jordan-in IS lakah beihpui a thlak

Jordan sipaite chuan Islamic State (IS) firfiakte'n pilot an thahsak avanga phuba lakna atan Ningani khan Syria rama IS te hmun pawimawh fighter jet hmangin an bei.

Jordan Armed Forces (JAF) chuan thuchhuah siamin, Royal Jordanian Air Force fighter jet 10 hmangin IS hmunte hi beih a ni, a ti a, firfiakte ralthuam dahna hmun leh training center-te an tihchhiatsak tih a tarlang.

IS laka beihpui an thlak chu 'Martyr Muath' tiin Jordan sipaite hian an vuah a, firfiakte'n Jordanian pilot Muath Kassasbeh an halhlulm vanga phuba an lakna tih an sawi bawk. Fighter jet-te hi an vaiin him takin Jordan ramah an kir leh tawh a, nasa zawka beihpui thlak chhunzawm an tum thu an sawi.

Sipaite hian an ram TV-ah IS vauna thuchhuah an siam zui a, "Tun hi a bul ṭanna chauh a ni a, Jordan mite chu eng ang nge an ni tih in la hre dawn a ni," an ti. Firfiakte chu nuai chimih an nih hma chuan an beih chhunzawm zel dawn tih an tarlang bawk. IS laka beihpui an thlak lai ṭhenkhat video hi TV-ah an tichhuak bawk.

Firfiakte'n pilot Kassasbeh an halhlum lai video an tih­chhuah hnu hian Jordan lal, King Abdullah II chuan na taka an chhan let tur thu sawiin, IS lakah hian indo a lo puang tawh a ni. King Abdullah chuan IS hian Jordan mite a bei a ni ringawt lo a, Islam leh a zirtirnate palzut zawngin a che a ni tiin, firfiakte chu an chakna lai ber aṭangin an bei dawn tih a lo sawi tawh a ni.

Foreign Minister Nasser Judeh chuan IS-te hi an neih zawng zawng hmangin an bei dawn tih a sawi bawk. "Kan bei let dawn tih kan sawi a, chuvangin an awmna hmun apiangah kan umzui zel dawn a ni," a ti.