Baghdad-ah curfew hlih a ni dawn

Iraq Prime Minister Hadier al-Abbadi chuan an ram khawpui, Baghdad-a kum sawm chuang zet zan lama curfew puan ṭhin chu hlip tur­in hriattirna a pe a, dan thar hi vawiin aṭangin hman a ni ang.

Baghdad Operation Brigade thupuangtu, Brigadier General Saad Maan chuan zan lama curfew puan ṭhin chu PM thupek angin hlih a ni dawn ta tih a sawi. He thutlukna hi AP hian operation command a tlawh ṭuma khawpui chhung dinhmunte a sawipui hnuah a siam ta tih Maan chuan a tarlang bawk.

Khawpui chhunga pawi­khawihna thleng ṭhinte a zia­awm theihna atan zan lamah curfew hi hun rei tak kalpui a ni tawh a, curfew in a huam chin chu ṭum eng emaw zat siam danglam a ni a, siamṭhat hnuhnung berah zanlai aṭangin zing dar 5 thleng puan a ni.

Curfew hlih a nih bakah hian khawpui ṭhenawm, Kadhamiya, Athamiya, Mansour leh Sadiya-ahte ralthuam lian tham lakluh phal a ni lo bawk ang. Khawpui chhehvelah security convoy pawh motor pathum chin bak phalsak a ni lo bawk.

Heng hmunahte hian local security force-te chauhin mi an man thei dawn tih PM chuan a sawi.