Israel PM-in US Congress-ah thu a sawi

Israel prime minister Benjamin Netanyahu chuan Nilaini khan US Congress joint session-ah thu a sawi a, Gaza Strip-a indona thleng mek chungchang sawiin, America rama Israel thlawp lotute chu a dem takzet tih a sawi.

Benjamin Netanyahu hian US Congress-a thu a sawi vawi lina a ni a, ram dang hruaitu zinga thu sawi ngun ber a ni a, darkar khat dawn a sawi a ni.

Israel PM hian Gaza indonaah hnehna pumhlum chang turin an bei zel dawn tih a sawi a, Israel-in Hamas leh Iran thlawp helpawl hrang hrang a beihna kawngah US thlawpna an mamawh thu a sawi. Hemi rual hian US ramchhunga Gaza indona duh lohna lan tir ṭhinte chu a dem tih a sawi bawk. "America leh Israel hi ṭanrual a ngai a ni. Kan ṭanrual chuan hnehna kan chang ṭhin a, kan elpuite an tlawm thung a ni" a ti.

Netanyahu hian Gaza indona chungchangah Israel sawiseltute chhang letin a duh lohna lantirtute chu ṭawngkam mawi lo takin a bei bawk. Israel PM chuan October 7, 2023-a Hamas-in Israel an beih ṭum khan naupang pawisawi lote pawh an that a ni tiin, Gaza indonaa Israel demtute hian pawikhawihna rapthlak tak thlentu, Hamas chu an thlawp a ni, a ti. Palestinian thlawpa nawrh huaihawtte chu Iran hmanruate tiin a sawi bawk.

Nilaini vek khan US khawpui Washington DC-a US Congress kawtah lungawi lohna lantirin mipui ṭhahnem tak an pung khawm a, mipui pung khawmte chuan Netanyahu chu 'war criminal' tia koin Gaza indonaah inkahhai puang tura an duh thute an aupui a ni. Mipui lungawi lo dan nan hian venghimtute chuan US House chu thir len sang hmangin an hungkual a, hei bakah hian mittui tlakna hlo hman tur pawh an inchhawp bawk. Dan siamtu zingah Netanyahu duh lotute chuan a thusawi hi boycott in US Congress-ah hian an inlan lo, heng zingah hian Democrats house member 50 telin anni bakah independent Bernie Sanders pawhin Netanyahu thusawi hi a boycott bawk a ni. Vice president Kamala Harris chu tih tur pawimawh a lo neih sa avangin joint session-ah hian a tel lo bawk a, mahse Netanyahu nen hian a hranin meeting an nei leh dawn a ni.

Democrats member eng emaw zatin Netanyahu thusawi an boycott laiin, Congress member tam tak chuan House-a a thusawi hi an lo lawm hle thung. Ṭum eng emaw zat an ṭhuthmun aṭanga dingin kut bengin a thusawite hi an lo lawm a ni. Netanyahu thusawi hi Hamas hoin Israel an beih ṭuma an man, chhuah zalen takte leh an chhungte ṭhenkhat pawh an chhim a ni.