SCO-in China-ah a vawi khat nan anti-terrorism drill nei

Shanghai Cooperation Organization (SCO) chuan a vawi khat nan helpawl beih let dan tur zirna hun China-ah a hmang. He hun hi Xinjiang Uygur Autonomous Region-ah neih a ni thu China ministry of public security chuan a tarlang.

SCO hnuaia thawkho ramte hian helpawl beihna chhan let dan tur zirna hun hi 'Interaction 2024' tia vuahin, SCO hnuaia thawk ho ramte an tel kim ṭum khatna a ni. He hunah hian SCO hnuaia ram thawk hote chuan helpawl beih let kawnga an inpuih theih dan tur leh hemi kawnga anmahni thuam chak theih dante tarlan a ni a, helpawl nuai chimit tura hma lak dan tur pawh an zir tel nia tarlan a ni bawk.

China sorkar enkawl, Xinhua news agency chuan drill neih laia sipaite chet dan leh an ralthuam hman thlalakte chu mipui hmuh theih turin a pho chhuak a ni. Chinese security expert, Li Wei chuan SCO ramte hian tun hmain helpawl beih let dan tur zirna hun hi nei fo mah se SCO hnuaia ramte an kim ngai lo tih a sawi. Tun ṭuma SCO ram zawng zawng an tel kim chuan he pawl hnuaia ram awmten helpawlin buaina an thlen theih an hriat chian tawh vang a ni, a ti bawk. Tun thla tir khan SCO-a tel ram 10-na ni turin Belarus chu lak luh a ni. Belarus bakah hian China, India, Iran, Kazakhstan, Kyrgyzstan, Pakistan, Russia, Tajikistan leh Uzbekistan te chu SCO member ni mek an ni.