Taiwan-ah Typhoon Gaemi vangin mi 2 thi; Lawng khalhtu mi 9 chin hriat lohin an awm

Taiwan chuan kum riat chhunga Typhoon a tuar nat ber tawngin Typhoon Gaemi vangin mi pahnihin nunna an chan a, hemi bakah hian thlipui leh ruahsur vanga bungraw phur lawng chesualah lawngkhawlhtu pakua chin hriat lohin an awm mek a ni.

Typhoon Gaemi vang hian Taiwan thuneitute chuan nimin khan school leh office-te kharin stock market pawh an titawp lailawk. Dinhmun hlauhawma dingte chu hmun him lamah thiar chhuak an ni bawk. Gaemi thlipui hian Taiwan a luh hma hian Philippines-ah tuilian leh leimin a thlen a, chhiatna thleng vang hian mi parukin nunna an chan a ni. Gaemi hi Nilaini khan Taiwan-ah lutin 190 km/hr a chak thlipui chuan Taiwan thliarkar chu a nuai a, chhiatna hrang hrang thlenin mi pahnih thi an awm bakah hliam mi 200 chuang an awm nia tarlan a ni.

Taiwan khawchin zirtute chuan Typhoon Gaemi chu tuipui aṭangin a chhuak ṭan a, a chakna a hloh ṭan tih an tarlang. Gaemi thlipui hi Fujian province, China lam a pan leh mek nia tarlan a ni. He province-ah hian rel service-te chu tihtawp niin tuilian laka inveng turin mipuite chu hriattir lawk an ni. Fujian bakah Zhejiang province-ah thlipui ken tel, ruah tam tak sur tura rin a nih avangin province pahnihte hi tuilian vanga harsatna tawk thei dinhmunah an ding bawk.