Germany-ah environmental activist-ten thlawhtheihna an dang

Germany-a airport lun ber, Frankfurt Airport-ah Ningani khan environmental activist-te chuan thlawhtheihna thlawk chhuak tur tibuaiin, flight 100 chuang cancel a ngaih phah.

Frankfurt Airport thuneitute chuan climate activist-te hi airport chhunga luh phal lohna hmunah lut luiin police, kangṭhelhtute leh airport security officer te an inrawlh a ngai hial niin an tarlang. He airport aṭanga thlawk chhuak tura ruahman, thlawhtheihna 100 chuang chu mipuite him zawk nan cancel a ni tih an puang zui bawk.

Environmental activist-te hian sik leh sa inthlak danglam chak tak thlen chhan pakhat chu thlawhtheihna hmang an tam vang niah ngaiin, Europe nipui chawlh hun laiin hmun hrang hranga activist-te chu intiamrualin thlawhtheihna thlawk chhuak tur an tibuai a ni.

Activist-te chuan thlawhtheihna in a hman tuialhthei vanga sik leh sa inthlak danglam chak zia mipuite hriat thar tir an duh tih an tarlang. Khawvel ram sorkarte chu kum 2030 hmain tuialhthei laihchhuah leh hman titawp turin an ngen bawk.

Frankfurt Airport thuneitute chuan an airport kalphung tibuaitute chu an en liam dawn lo a, dan angin hremna pek ngei an tum tih an sawi. Activist-te chet dan chuan mipuite himna a tiderthawng niin an sawi.

Germany-ah vek hian Nilaini khan Cologne-Bonn Airport-a thlawhtheihna thlawk chhuak tur chu activist-te hian an lo tibuai tawh a, thlawh chhuah hun tur darkar thuma tihkhawtlai a ngaih phah a ni. Heng bakah hian Europe hmun hrang hrangah hetiang thil ti leh tih tum hi an awm bawk. Finland-a Helsinki Airport luhka chu activist-ten darkar chanve an dang a, thlawhtheihna thlawk chhuak tur erawh an tibuai lo thung. England-a Heathrow Airport-ah pawh activist-te chuan buaina thlen tum mah se venghimtu lamin an dang thei hram a ni.