Ethiopia-ah leimin vanga thi mi 257 an tling tawh

Ethiopia chhim lama leimin vanga nunna chan zat an pung zel a, hriat theih chinah thi hi mi 257 an tling tawh a ni. United Nations humanitarian agency, OCHA chuan thi zat hi 500 thlengin an la pung thei dawn niin a sawi.

U.N. chief Antonio Guterres chuan Ethiopia-a chhiatna tuartute chu a tawrhpui thu a sawi. UN thupuangtu Stephane Dujarric pawhin chhiatna thleng chuan a tihrehawm takzet tih a sawi ve bawk. Dujjaric chuan UN leh a thawhpuite chuan Ethiopia sorkar nena ṭangrualin chhiatna tawkte mamawh an ngaihtuah tih a sawi a, he leimin vanga bungrua an chan hlut zawng pawh chhut mek a ni, a ti. UN hnuaia angency hrang hrangte chuan ei tur leh nitin mamawh dangte chu leimin tuarte tan an thawn lut tawh tih a sawi bawk.

Kencho Shacha Gozdi district, Ethiopia-ah Thawhṭanni zing kha leimin nasa tak hi a thleng a ni. OCHA chuan leimin thlen leh theihna laia awm mi 15,000 chu hmun him lamah sawn chhuah an ni tih a tarlang a, an zinga 1,320 chu naupang kum 5 hnuailam niin naupai lai leh nausen pawm hmeichhia 5,293 an tel tih a tarlang bawk. Ethiopia Red Cross Society chuan chhawmdawlna phurtu truck pali a tir lut tawh a, leiminna hmun hi a kilkhawr bakah tlawhpawh a harsat avangin chhawmdawlna thawn luh chak theih a ni lo a ni. Thawhṭannia leimin hi Ethiopia a leimin vanga nunna chan an tam ber ṭum a ni.