Republican National Convention neih ṭan a ni President candidate atan Donald Trump nominate

US-a Republican Party chuan an ram huna Thawhṭanni zan aṭang khan ni li awh tur, Republican National Convention (RNC) 2020 chu Charlotte, North Carolina-ah an nei ṭan a, President nilai Donald Trump chu kumin November thlaa President thar thlanna neih tura an party candidate atan an nominate. 

Vice preisdent Mike Pence pawh a term hnihna atan nominate a ni bawk. Hripui leng vangin RNC-ah hian mipui an pungkhawm thei lo a, president candidate tur nominate tur hian party delegate 336 chauh convention centre-ah an kal a ni. Vote lak hnuah Trump chu party official candidate atan puan a ni a, hemi hnu hian Trump chu stage-a rawn inlanin thu a sawi zui nghal a ni. President Trump chuan November thlaa inthlan an neih tur chu an ram tana inthlan pawimawh ber tur a ni tih a sawi. 

Kumina RNC-ah hian "Honoring the Great American Story" tih chu thupuiah neih a ni a, convention chhung hian zantin sub-theme an nei tel bawk. Thawhṭanni zan khan sub-theme atan "Land of Promise" tih hman a ni. Ningani zanah Trump chuan party presidential candidate atana nominate a pawmna thu hi White House South Lawn aṭangin a sawi ang.