Seoul-ah school tam zawk khar tir

South Korea sorkar chuan nimin khan thuchhuah siamin, an khawpui Seoul huam chunga school tam zawk chu Covid-19 vanga khar rih turin a hriattir. 

Thawhṭanni zan khan South Korea-ah hian hri kai thar mi 280 an awm tih Centers for Disease Control and Prevention chuan a tarlang. Hri kai thar an awm leh tak avang hian sorkar chuan an ram khawpuia school tam zawk chu khar turin a hriattir zui ta a ni. 

Heng hri kai tharte nen hian SKorea-a Covid-19 kai tawh zawng zawng hi nimin thleng khan mi 17,945 an awm tawh a, thihpui tawh mi 310 an awm tawh bawk a ni. Ministry of Education chuan nimin khan high school senior zirlai ni lo zawng, Seoul leh Incheon a awm zirlaite chu September 11 thleng online class kalpui turin hriattirna a tichhuak. Anni huna academic year-a spring semester ṭan hun chu kumin March thla kha a ni a, mahse Covid-19 hri leng vangin vawi tam ṭan hun sawn a ni. SKorea school tam zawk chu May 20 aṭanga June 1 inkar khan an kal ṭan.

Hmun ṭhenkhata school hawn a nih hnuah, kar hnih liam ta khan Seoul-a zirlai 150 leh school staff 43 chuan Covid-19 an kai tih Education Minister Yoo Eun-hae chuan a sawi. Kumin kum tir lama Covid-19 hri darh ṭan lai khan SKorea hi hri kai tamna ram a ni hmasa a, sorkarin invenna tura ruahmanna a siam hrang hrangte kalpui a nih hnuah hri leng hi a ziaawm chak hle. Mahse tun hnaiah hri kai hmuh thar hi an pung leh ṭan a, hei vang hian hri leng thawh hnihna a thlen an hlauthawng hle a ni. Sorkar chuan invenna lamah theihtawpin ṭan a la thar leh nghal a, inzin pawh tawnnaah pawh khuahkhirhna siamin, mipuite chu pawn chhuak tam lo turin a ngen.