US-ah hri kai punna tlahniam

US chu Covid-19 hri kai tamna ber ram ni chhunzawm zel mah se, hri kai thar punna chuan a zawnin kar nga chhung tlakhniam lam a pan tawh.

Kar liam ta khan hri vanga thi hi mi 6,700 chuang an la awm a, mahse a kar hmasa nena khaikhin chuan thi zat hi 9% in a tlahniam.  Ram pumah kar liam ta khan hri kai hmuh thar mi 2,97,000 vel an awm a, mahse July thla nena khaikhin chuan a tlahniam tawh hle. July thla khan kar khata hri kai hmuh tam ber ṭum chuan mi 4,68,000 chuang an tling. Hri kai  thar hi an tlahniam ve zel a, hun eng emaw chen chu ni khatah hri kai hmuh thar hi 50,000 an tling pha tawh lo..    

Kar liam taa US-a hri kai thar tamna hi South Dakota a ni a, hri kai thar zawng zawng aṭanga 50% an tling pha. South Dakota-a hri kai an pun chakna chhan hi August 7-16 chhunga motorcycle rally an neih 

ṭuma inkai darh niin an sawi. South Carolina state-ah US-a hri kai zawng zawng zinga 22% an awm a, Texas, Nevada leh Idaho-te chu hri kai tam zualna state an ni bawk. July thla khan nitin sample sample lak 8,00,000 vel test a ni a, mahse kar liam ta chhung khan sample hi ni khatah 6,75,000 vel test a ni  thung. US-a Covid-19 hri kai hmasa ber chu kumin January 20 khan hmuh chhuah niin, Wuhan, China aṭanga haw a ni. 

President Donald Trump chuan an rama hripui leng vanga sum lama harsatna tawk chhungkua te chhawmdawlna tur programme siamah sorkar chuan dollar tluklehdingawn khat a pek belh dawn tih a sawi. 

Sorkar programme siam, Farmers to Families Food Box programme hi loneitu, restaurant hrang hranga thalai leh ei tur pe ṭhin, mahse restaurant-te khar a nih tak avanga an sumdawnna hlohte tana a duan a ni. Heng mite hnen aṭang hian an thil siam leh thar chhuah te lei sakin, hripui leng vanga hna chan tate chhawmdawlna turin sem a ni. July thla khan sorkar chuan he programme hnuaiah hian dollar tluklehdingawn thum hu chhawm­dawlna a lo sem tawh a ni.