Nigeria ram inthlan hun tur sawn hla
Nigeria rama President leh parliament inthlan neih tur chu venhimna lam venthawn thilah sawnhlat a ni.
Independent National Electoral Commission (INEC) hotu, Attahiru Jega chuan February 14-a inthlan buatsaih tura ruahman chu March 28 ah sawn a ni, a ti.
February 28-a Governor leh House of Assembly inthlan neih tur pawh April 11-ah sawn a ni bawk.
National Council of State chuan kar kalta khan an ram inthlan neih tur leh, an ram chhung security chungchangte uluk takin a thlir a, ram chhung hmun ṭhenkhatah helho vauna leh pawikhawihna te a thlen reng avangin inthlan hi kaltlangpui chi a nih leh nih loh te an ngaihtuah. Mahse council member zingah ngei pawh ngaihdan a ni an loh avangin thutlukna an siam thei lo.
Council-in inthlan chungchangah thutlukna a siam theih loh avangin INEC hotu, Jega chu National Electoral Commissioners te, resident electoral commissioner leh political party hrang hrangte sawipui tura tih a ni.
Jega chuan an ram hmarchhak lama Islamic helho laka beihpui thlak tura sipai ṭhahnem tham tak dah a nih avangin inthlan vuakvetah sipai duty tur an duh ang zat a awm thei dawn lo tih security hotute'n an sawi a, hei vang hian inthlan hun pawh hi sawnhla mai tura an hrilh thu a sawi.
INEC hotu chuan, "Security mite, voter, election observer leh election hmanruate himna tura intiamkamna a awm theih loh chuan, inthlan hi tihchingpen theih a ni a, hei bakah hian pawisawilo te nunna thlengin a derthawn phah thei a ni," a ti. INEC hian electoral staff 700,000 bakah ad hoc staff 600,000 a nei.