Jordan-in IS lakah beihpui a thlak chhunzawm

Jordan sipaite chuan Islamic State (IS) firfiakte'n Jordanian pilot an halhlum avanga phuba an lak chu chhunzawmin, Inrinni khan Syria rama IS firfiakte hmun pawimawh an beih chhunzawm leh.

Sipaite hian fighter jet hmangin IS hmun pawimawh tak tak an bomb sak tih an website-ah an tarlang.

Kar kalta kartir lam khan IS hian video an tihchhuahah, Jordanian pilot an halhlum lai an tilang a, hei hian Jordan sorkar leh mipuite a ti thinur hle a, Jordan lal King Abdullah II chuan na takin an chhan let tur thu a lo sawi tawh a ni. King Abdullah chuan Islam sakhua leh a zirtirnate humhimna atan IS-te chu an bei let tih a sawi.

Inrinnia Jordan sipaite'n beihpui an thlakna pui turin United Arab Emirates chuan F-16 fighter jet a tir tih a sawi. Jordan leh UAE hi US kaihhruaia Iraq leh Syria rama ṭangrual pawlin IS laka beihpui an thlak mekah an tel.