Thailand sipai sorkarin PM hlui dilna a hnawlsak

Thailand rama sipai sorkar chuan Prime Minister hlui Yingluck Shinawatra-i'n zin chhuah phalna a dil chu a hnawlsak.

Yingluck-i hi thuneihna a chan laia sorkarin dik lo taka rice scheme a kalpui chungchangah inhnamhnawiha puhin kar hmasa khan thiam loh chantir a ni a, kum nga chhung politics khel thei loa hrem a ni. Man to taka loneitute hnen aṭanga buhfai leisak an nih avangin sorkar chuan sum tam tak a hloh a, buhfai an leisaknate hi Shinawatra thlawptu lamte nia sawi a ni.

PM hlui hian nimin, Pathianni aṭanga Ferbuary 22 thleng zin chhuah a dil a, February 19 hian Supreme Court-ah inlan tura tih a nih avangin a zinchhuah hi a rem lo niin sorkar thupuangtu Sunsern Kaewkumnerd chuan a sawi.

Hetihlai hian Yingluck-i ukil, Norawit Laleng chuan thla hnih chhung chu Yingluck-i hi court-ah a inlan kher a ngai lo tih sawiin, sipai sorkarin zin a dilna a hnawlsak hi a dikna palzutna a ni, a ti.