Houthi helhoin Yemen sorkar an paihthla

Houthi helho chuan Yemen sorkar an paihthlak thu leh Parliament an ṭhiah thu leh kar kalta Zirtawpni khan an puang a, President hna chanpual thawk tura council an ruat tur thu an sawi nghal bawk.

Kum 2012-a Yemen President Ali Abdullah Saleh-a kaihhruai sorkar paihthlak a nih aṭang khan Yemen ram politics dinhmunin ngai a awh thei lo a, party hrang hrang inkarah buaina a awm chho reng a ni. Houthi helte hian thla hmasa khan an ram rorelna hi an thunun theih nan President chenna in lain, President Abedrabbo Mansour Hadi pawh a inah hian hun eng emaw chen an hreng a ni. Hemi hnu hian helho phut angin President hi a bang a, helho pawh hi an insaseng zui ve ta a ni.

Shia Muslim, Houthi helho hian an ram khawpui, Sanaa chu nikum September thla khan an la a ni, Zirtawpni khan an ram thuneihna chu an kuta a awm thu an puang.

Houthi helte chuan Parliament thlak turin member 551 awmna national council din an tum thu an sawi a, hetihlai hian kum 2 chhung ro lo rel lailawk turin member 5 awmna, president council din a ni phawt ang, an ti.

Houthi helten Yemen sorkar an paihthlak chu Gulf ramte'n an pawm loh thu an sawi a, ram paruk telna Gulf Cooperation Council chuan sorkar paihthlak chuan Yemen leh a chhevel bial himna leh ngelnghetna a tihderthawng bakah, mipuite himna thlengin a tiderthawng a ni, an ti.