Lei lam atangin IS beih a ni thuai dawn: US
US envoy General John Allen chuan US kaihhruaia ṭangrual pawlte'n thlawhtheihna hmanga Islamic State (IS) laka beihpui an thlak chu an huang zauhin, lei lam aṭangin beihpui thlak thuai a ni ang, a ti.
Lei lama beihpui thlakna turah hian Iraq sipaite chu a hmahruaitu an ni ang a, ṭangrual pawlte hian an thlawp dawn tih Gneral Allen chuan a sawi. Beihpui thlakna tur atan hian an inbuatsaih ṭan thu leh, Iraq sipaite pawhin training an ṭan tawh thu a sawi.
Allen chuan IS laka beihpui thlaktu, ṭangrual pawlah hian ram 62 an tel tawh a, East Asia ramte pawh tel tura sawm turin a tlawh dawn tih a sawi bawk.
Jordan-in IS laka beihpui a thlak meknaa pui turin Pathianni khan United Arab Emirates chuan fighter jet F-16 leh pilot, technician leh hmanraw dangte chu Jordan ramah a thawn lut. Royal Jordan Air Force chuan IS-te hi an bei chhunzawm zel dawn tih an sawi.
Jordan sipaite hian a zawnin ni thum chu Syria rama IS hmun pawimawhte an bei tawh a, leadership centre leh training camp bakah an ralthuam leh motor eng emaw zat an tihchhiatsak. Ni thum chhungin Jordan hian ṭum 56 a bomb.
Syria Information Minister Omran al-Zoubi chuan IS firfiakte'n an ram an lakte chu lakkir sak leh vek an tum tih sawiin, an lakkir hma chuan an sipaite'n an bei dawn a ni, a ti. Syria chuan a ram chhunga inlakhran tumte nuaibo turin theihtawp a chhuah dawn a hmarlama Kurds bial leh chhim lama Daraa bialte chu an lakir leh dawn tih a sawi.