Cairo-a football khelhnaa buaina chhuakah mi 40 thi

Pathianni khan Egypt khawpui, Cairo-a football khelhna hmuna Zamalek football club supporter leh police-te inkara buaina chhuak vangin mi 40 vel an thi a, mi dang eng emaw zatin hliam an tuar.

Cairo khawpui hmar­chhak lama an inkhelhna hi Air Defence Stadium a ni a, Zamalek FC supporter, Ultras White Knights tia sawite hian ticket lei loin inkhel en an tum a, police te'n lo dangin an innawr buai ta a ni.

Egypt Interior Ministry chuan Zamelek club fan-te'n stadium-a luh luih an tum vangin buaina a chhuak a ti a, mahse fan te chuan thuneitute'n gate pakhat chauh an hawn vangin an innekbuai a, buaina hi a chuak ta niin an sawi thung. Mipui pungkhawmte hnawhdarh nan hian police te chuan tear gas an hmang.

Kum 2011-a Egypt President Hosni Mubarak paihthlak a nihna kawng­ah football club supporter-te hian inrawlhna tam tak an nei a, hei vang hian fans groups, Ultras leh security force te inkar boruak hi tun thlengin a la ṭha lo nia sawi a ni. Ultras te hian stadium chhung leh pawn lamah te, political protest-ahte security force-te hi an tihbuai fo a ni. Ultras-te hi Africa rama 'fans kawlh ber' tia sawi an ni bawk.

Pathianni zana stadium pawn lama buaina nasa tak a chhuak chung hian inkhel hi chhunzawm a ni tho a, hei hian fan-te a thinur zual hle. Egypt public prosecutor chuan buaina chhuak chungchang hi chhuichiang turin thupek a tichhuak a, sorkar chuan Premier League chu tihtawp rih a nih tur thu a sawi.