Malaysia eptu hruaitu Court-in thiam loh chantir

Malaysia Federal Court chuan a mipatpui kawpa puhna chungchanga eptu hruaitu, Anwar Ibrahim-a thiam loh a chantirna chu nemnghetin, appeal a dilna a hnawlsak.

Federal Court-in a hremna a nemngheh tak avangin kum 2014, March thlaa hremna lo pek tawh angin Anwar Ibrahim hi kum nga tang turin lung-inah khung nghal a ni ang.

Anwar hian an puhnate chu politics lama a dinhmun tih­chhiatsak tuma an phiarna a ni tih court a hrilh a, "Tihsual engmah ka nei lo a, hei hi ka political career min tihtawpsak an tumna mai a ni," a ti.

Eptu hruaitu hi kum 2008 khan politics-a a thawhpui, mipa vek kawpah puh a ni. Muslim tamna ram, Malaysia-ah hian mahni anpui kawp phal a ni loh bakah thilsual lian taka ngaih a ni.

Kum 2012 khan High Court chuan Anwar puhna chung­changah hian finfiahna a awm ṭha tawk lo tiin a thubuaiah a lo fihlim tir tawh a, mahse sorkar chuan High Court thutlukna hi a appeal a, ngaihdam a nihna hi hnawl a ni leh ta a ni. Hemi hnu hian Anwar hian thiam loh chantir a nihna chu Federal Court-ah a appeal ve leh thung a, mahse court chuan a ngenna hi a lo hnawlsak.

Sorkar bei thei leh lehthal thei tur bera ngaih, politics lama beiseina eng tak nei, Anwar hi kum nga lung-in tantir a nih bakah, kum nga chhung politics a khelh khapsak a ni bawk. Hei vang hian a tan pawh politics lama invawrh chhoh leh a harsat hle rin a ni.

Human Rights Watch chuan eptu hruaitu hrem a nih dan chung­changah Prime Minister Najib Razak-a kaihhruai sorkar thiltih dan chu a dem thu a sawi a, group Asia director Phil Robertson chuan dik lo taka rorelna hi Malaysia rama mipuite dikna chanvo leh democracy zahlohna a ni, a ti.