Cameroon-ah mi 30 rukbo an ni

Nigeria helpawl, Boko Haram-te chuan Nigeria ramri bul Cameroon Far North Region-a Tourou khuaah bus beiin mi 30 an ru bo.

Pathianni khan helho hian Cameroon sipaite chu Kerawa khuaah an bei bawk a, sipai pakua-in hliam an tuar. He hmunah vek hian January 1 khan helho hian bus-a chuang mi 11 an lo that tawh bawk.

Hetihlai hian Nigeria National Security Adviser, Sambo Dasuki chuan Boko Haram-te hi na taka beih let zel an tum thu sawiin, kar ruk chhungin an camp-te tih­chhiatsak vek a ni ang, a ti.

Dasuki chuan, "Boko Haram camp kan hriat zawng zawng chu kan bei dawn a, kan tichhe vek dawn a ni," a ti. Helho vanga February 14-a an ram inthlanpui neih tur, March 28-a sawnhlat chu thlak danglam ngai tawh lo turin helho hi nuai chimih an ni ang, a ti.

Helho bei tur hian Nigeria leh a ṭhenawm ram, Cameron, Chad leh Niger sipaite chuan thawhho an remti a, hei hian helho beihna kawng­ah nghawng a nei thui thei hle dawn a ni.

Nigeria sorkar hian February 14-a an ram inthlanpui neih tur sawn hlat a nih chhan chu an ram hmarchhak lama Boko Haram hel bei tur hian sipai ṭhahnem tak leh ral­thuam an neih angte hman a ni a, inthlan vuakvetah rampum huapin venhimna an pek theih dawn loh vang niin a sawi. Hei hi eptu lamte chuan an sawisel a, helho bei tur hian sipaite leh police-te chu an mamawh tawpah chauh koh an ni ṭhin, an ti.