Iraq-a Kristiante pui turin sipai chet a ngai: Archbishop

Archbishop of Iris chuan UK MP-te hnenah Iraq rama Kristiante pui turin lei lam sipaite an chet a ngai a ni, a ti.

Islamic State (IS) firfiakte beihna atana chung lam aṭanga beihpui thlak ringawt chu a tawk tawh lo a ti a, firfiakte bei tur hian khawthlang sipaite dah lut thuai turin a ngen.

Archbishop chuan Iraq rama Kris­tiante'n kiam lam an pan zel a, hei vang hian hma lak zel dan tur pawh UK sorkar sawipui a tum thu a sawi.

Catholic Chaldean Church hotu, Archbishop Ward hian London a tlawh ṭumin he thu hi a sawi a, kum sawm kalta chhung khan Iraq Kristiante chu nasa takin an kiam a ni, a ti.

Kum 2014 nipui laia IS firfiakte'n Kristiante chu an sakhua thlaktir tuma an vau avangin hemi kum hian Kristian sing tel chu an tlanchhia tih sawiin, Archbishop chuan, "Helai biala Kristiante hian hun kan nei tlem tawh a ni," a ti. Kristian a nihna leh Catholic a nihna angin sawi hrehawm ti viau mah se, khawmual sipaite an chet a ngai tawh a ni, a ti.