Israel sipaite'n leiverh an tichhia

Israel sipaite chuan Gaza Strip khawchhak lam aṭanga Israel rama luhrukna tura leiverh siam chu Thawhṭanni zing khan an tichhia.

Israel sipaite chuan leiverh an tihchhiat ngei thu an sawi a, mahse an tihchhiat dawn hian sipaite chu Gaza Strip-ah an lut lo a, Israel lam aṭang veka tihchhiat a ni, an ti.

Nikum July 8 khan Israel sipate chuan Gaza Strip-ah ni 50 awh beihpui an thlak ṭan a, an beihpui thlak chhan ber chu firfiakte'n Israel beihna atana ralthuam lakluhna tura an hman, leiverh tihchhiat a ni tih an sawi.

Hemi ṭuma beihpui thlakna avang hian Palestinian 2,200 chuang an thi a, thi zinga a tam zawk hi civil mi an ni. Israel mi 73 an thi bawk a, an zingah hian sipai paruk an tel.

Israel sipaite chuan beihpui an thlaknaah hian ramri kaltlanga leiverh rûk 31 an tihchiat thu an sawi.