UAE in IS firfiakte lakah beihpui thlak

United Arab Emirates (UAE) chuan Jordan ram aṭangin thlawhtheihna hmangin Islamic State (IS) firfiakte lakah beihpui a thlak leh.

IS firfiakte'n Jordanian pilot an halhlum avanga Jordan-in phuba lakna atana beihpui a thlaknaa pui turin UAE hian Pathianni khan indo thlawhtheihna, Emirati F-16 rual a thawn lut. Thawhlehni khan Syria rama IS hmun pawimawhte beiin him takin Jordan lamah an kir leh niin UAE armed forces command chuan a sawi.

Firfiakte laka beihpui thlak tur hian thlawhtheihna hi eng zat nge tirh a nih leh, khawi lai hmun nge an beih sawichian a ni lo. Nikum December thlaa US kaihhruai ṭangrual pawlte'n firfiakte an beihnaa Jordan­ian pilot Moaz al-Kassasbeh thlawhtheihna khalh a tlak hnua firfiakte'n amah an lo man nghal avang khan UAE hian a pilot-te himna atan venthawn thilah beihpui thlaknaah hian an tel chhunzawm tawh lo. Mahse firfiakte'n rawng taka Kassasbeh an halhlum avanga Jordan-in a beih letnaah pui turin a thawk chhuak leh a ni.

US President Barack Obama chuan firfiakte'n an hren, America mi Kayla Mueller chu a thi tawh tih a sawi a, a thihnaa mawhphurtute chu US chuan zawngchhuakin an chungah ro relsak an ni ang, a ti. Chhawmdawl hna thawktu, kum 26 mi Kayla Mueller hi kum 2013, August thla khan Syria hmarlam, Aleppo-ah firfiakte'n an man.

IS chuan Jordan sipaite'n kar kaltaa Raqa-a beihpui an thlaknaah khan Kaya hi a thi niin an sawi. Mahse US official-te chuan Kayla thihdan chungchanga IS thusawi hi an rinhlelh thu an sawi a, Raqa-a beihpui thlak dawn hian civil mi an awm lo tih finfiah vek phawt a ni, an ti.

Syria President Bashir al-Assad chuan ṭangrual pawlte'n chunglam aṭanga beihpui an thlak ringawt chu IS-te hnehna atan a tawk lo, a ti a, firfiakte hneh tur chuan ṭangrual pawlte leh Syria sipaite'n lei lamah an thawhho ṭhat a ngai a ni, a ti.

Hetihlai hian IS firfiak pawl hian campaign nei tharin, Europe-a an mi leh sate chu pawisawilote pawh that turin an chah. IS hian an campaign thupui atan hian 'Enge i la nghah?' tih an hmang a, French ṭawng hmanna rama cheng an pawl mi leh sate chu inralring renga awm a, pawisawilote pawh zuah lo turin an ti. Kar hmasa khan video thar an lo tichhuak tawh bawk a, hetah hian Muslim mi, France rama chengte chu pawikhawihna thlen chhunzawm zel turin an fuih.

IS pawl zawm tur hian ramdang aṭangin mi eng emaw zatin Iraq leh Syria an lut nia sawi an ni a, an zingah hian khawthlang ram aṭangin mi 3,400 vel an tel nia sawi a ni.