Sisi leh Putin-a'n Egypt-a power plant siam an remti

Egypt President Abdel-Fattah al-Sisi leh an ram tlawhtu, Russia President Vladimir Putin chuan Egypt tuipui kam, Matrouh province, Dabaa khuaa nucler power station siamna turah inremna thuthlung an ziak.

Cairo-a presidential palace-a meeting an zawh hnua joint press conference an neihah, Sisi chuan Dabaa-a nuclear power station siamna tura inremna thuthlung ziahna inkhawm hi President Putin nen an hmanpui tih a sawi. Putin-a'n an ram a tlawh hian ram pahnih­te thawhdunna pawh a tih­ngheh phah dawn a ni, a ti.

Egypt President chuan, "Russia leh Egypt sipaite thawhdunna pawh chhunzawm zel kan remti bawk," a ti a, firfiaka chetna do tura Egypt hmalaknate Russia-in a lo thlawp ṭhin chu lawmawm a tih thu a sawi bawk.

President Putin pawhin Sisi nen field hrang hranga thawhdunna chungchang an sawidun a ni tih a sawi a, nuclear power station siam tur hian Egypt economy tan kawng thar a hawnsak dawn a ni, a ti. Putin chuan Egypt ramah Russia company 400 an inbun tawh a, kum 2014 chhung khan Russia mi maktaduai thum velin Egypt an tlawh thu a sawi.