Israel beihna vangin Gaza-ah mi 30 an thi

Israel chuan Gaza Strip-a beihpui a thlak chu chhunzawm zelin, kar liam ta Inrinni khan central Gaza-a school leh damdawi-in chu rocket hmangin a kap fuh. Hei vang hian Deir Al-Balah girl school-a tawmhimna zawnga biru mi 30 an thi niin Palestinian lam chuan an sawi.

Israel sipaite hian Hamas-in ralthuam an dahṭhatna hmun leh an ral relna hmunte an bitum tih an tarlang thung.

Deir Al-Balah hmeichhe sikula awm, Israel-in a kah fuhte hi Al Aqsa Hospital-ah hruai nghal niin a hnuah an thi tih puan a ni. Gaza health ministry chuan Inrinni vek khan Israel beihna vangin mi 11 dang an thi tih a tarlang bawk.

Israel sipaite hian humanitarian zone-a puan hmun ṭhenkhat aṭangin rocket hmanga Israel a nih thu leh, an chhan let dawn avangin heng hmuna civil mite chu inthiar chhuak turin a hriattir a, Hamas sipaite beih an duh vang a ni tih an tarlang. U.N. agency for Palestinian refugees, UNRWA chuan Israel thupek hian mi engzat nge a nghawng tih sawi chian a har tih sawiin, heng hmuna khawsate hi vawi tam an awmna sawn sak a n ni tawh tih an tarlang tel bawk. Gaza health ministry chuan Gaza indona avanga Palestinian mi nunna chan hi mi 39,100 an tling tawh a, Israel sipaite hian helpawl leh civil mite an thliar lo a ni, an ti.

Hezbollah-in rocket hmanga a beihnaah Israel mi 10 thi

Israel awpna hnuaia awm, Golan Heights chu Inrinni vek khan Lebanon-a inkhuar, Hezbollah helpawl chuan rocket hmanga kapin Israel mi 10 in nunna an chan.

Lebanon chhim lama thingtlang khaw pakhat chu Israel rocket-a kah fuh niin mi pathum an thi a, hemi chhan let nan hian Israel chu an bei zui ve nghal tih Hezbollah chuan an puang. Hezbollah rocket kah chhuah hian Majdal Shams, Golan Heights a khelmual fuhin mi 10 an thi a, mi dang tam tak an hliam bawk.

US tlawha zin mek Israel prime minister Benjamin Netanyahu pawh US aṭang hian hmanhmawh takin a haw nghal a, Hezbollah-te chuan he inbeihna vang hian an tuar ve ngei dawn tih a sawi. Rear Adm. Daniel Hagari chuan mi 10 thite hi kum 10 aṭanga 20 inkar an nih thu sawiin midang 20 vel an hliam bawk tih a tarlang. Hezbollah hian Israel sipai hmun an kap tiin an sawi ve thung.