ASEAN ramten buaina titawp turin Myanmar an ngen

Association of Southeast Asian Nations (ASEAN)-a foreign minister-te chuan kum 2021 aṭanga sipai rorelna hnuaia awm, Myanmar rama buaina chhuak ṭhin chu an dem tih tarlangin Myanmar-a pawl hrang hrangte chu remna zawng turin an ngen.

ASEAN rama foreign minister-te hi July 27, Inrinni aṭang khan Laos-ah intawkkhawmin an ṭhianṭha ram - United States, China, Russia, Japan, India leh Australia palaite nen an inkarah inzawmna a ngheh leh zual dan tur bakah, Asia chhim chhaka boruak ralmuang awm dan tur leh thil pawimawh dangte an sawi ho a ni. ASEAN hnuaiah hian ram 10 - Brunei, Burma, Cambodia, Indonesia, Laos, Malaysia, Philippines, Singapore, Thailand leh Vietnam-te an awm.

Tualchhung buainain a chiahpiah reng Myanmar buaina chuan zual lam a pan zel avangin ASEAN ram FM-te hian pawl hrang hrang inrawlhte chu indona titawp turin an ngen a ni. Thailand chuan ramri inṭawm an nih angin Myanmar buaina chingfel tur hian thuk zawka inrawlh an inpeih thu an sawi. Thailand Ministry of Foreign Affairs thupuangtu, Nikorndej Balankura chuan inbiakna zau zawka neih tum a ni tih sawiin, buaina a reh theih nana mi pawimawhte chu a kim thei ang bera telh tum an ni, a ti.

ASEAN ram palaite hian South China Sea-a innghirnghona awm chungchang pawh an sawi ho bawk. ASEAN ram zingah Vietnam, Philippines, Malaysia leh Brunei te chuan he tuipuiah hian China nen buaina an nei a, buaina lian zawk a chhuah loh nan tuipui ramri inchuhnaah hian inbiakna neih an tum a ni.