US : Ram kang vangin California a buai

US-a California hmar lama ram kang, kar liam ta Nilaini aṭanga inṭan chu a inmankai chak em avangin Pathianni thleng khan ram acres 350,000 a kang tawh nia tarlan a ni. Ram kang zau zawng hi Los Angeles khawpui tiat vel a ni tawh nia tarlan a ni bawk.

California Department of Forestry and Fire Protection chuan California khawpui, Sacramento hmar lam kilometer 144 vela hlaah ram kang hi a thleng tih an tarlang. Pathianni zing thleng khan kangmei chhuak 10% chauh ṭhelh mih a la ni tih an sawi bawk. Hetih lai hian boruak a dai chhoh deuh tura beisei a nih avangin kang ṭhelh hna pawh hi chak zawka kalpui theih a beiseiawm niin thuneitute chuan an sawi. Ram kan chhan hi hal a nih vang ni ngeia hriat niin, a haltu nia ngaih chu man a ni tawh.

White House official chuan ram kang chungchang hi President Joe Biden hrilh hriat a ni tawh a, a ni pawhin thawktute chu kangmei chhuak ṭhelh khawnga theihtawp chhuah turin a chah a ni, a ti. National Interagency Fire Center-in a tarlan danin, US-a ram kang thleng mek zingah California ram kang chu a lian ber tih an sawi. Ram kang ṭhelh mih tum hian kangṭhelhtu 2,500 chuan chhun leh zan chawl loin an bei a ni.