President Obama-a'n ISIL beih phalna Congress-ah dil

US President Barack Obama chuan khawmual sipai chakna hmanga Islamic State of Iraq and Levant (ISIL) firfiak pawlte beih phalna Congress a dil a, firfiak pawlte hi US tan pawh an hlauhawm thei dawn a ni, a ti.

Congress-a draft resolution a thawnah, President Obama chuan kum thum chhung tal IS firfiakte lakah hian ram bithliah bik awm loa beihpui thlak phalsak turin a dil a ni. Obama chuan a rawtna siam hi President term tharah Congress-in a ennawn leh thei ang tiin a rawt bawk.

Khawmual sipaite hmanga Afghanistan leh Iraq-a hun rei tak firfiakte laka beihpui thlak ang kha kalpui leh phalsak tura ngenin, Obama chuan an hma­lakna tur zingah hian chhan­chhuah hna thawktu, chanchin lakkhawm leh IS hruaitute bei tura a ṭul anga special operation force hmante a tel tih a sawi.

President Obama chuan IS firfiakte kuta thi tawh, America mi James Foley, Steven Sotloff, Abdul-Rahman Peter Kassig leh Kayla Mueller-te hming pawh a sawichhuak a, "ISIL te hi danbeh an nih loh chuan Middle East pawn lamah, US ram thlengin an hlauhawm thei dawn a ni," a ti.

UN Security Council chuan IS pawlin oil an hralhna aṭanga sum tam tak an lakluh ṭhin chu danchah sak an nih theihna turin resolution siam a tum. Resolution an duan lawkah chuan IS bakah a thurualpui Syria rama Al-Nusra Front leh al-Qaida nena inzawmna neite nena oil lama insumdawn tawnna la kalpuitu, mimal leh pawlte laka hrekna siamte a tel. UNSC chuan UN member ram 193 te chu Iraq leh Syria rama firfiakte nena sumdawnna neih tumte veng tura a ṭul anga hma la turin a ngen bawk.

UN al-Qaida monitoring team-in November-a report a tihchhuahah IS firfiak pawl hian Iraq-a a ram lak huamchhunga oil a hralhchhuah aṭangin nitin dollar 850,000 aṭanga maktaduai 1.65 inkar an lalut ṭhin niin a tarlang.

UN-a Iraq ambassador, Mohamed Ali Alhakim chuan nikuma IS firfiakte'n an ram khawchhak lama khawpui pawimawh, Mosul an lak hnuah khawpui chhunga an ram rohlu tam tak chu rukbo a ni tawh, an ti. Alhakim chuan, "Mosul hi hmanlai aṭanga khawpui pawimawh a ni a, Univeristy of Mosul pawh hi khawvela a upa ber pawl a ni. Khawpui chhunga hnam rohlu tak takte chu rukbo an ni a, hmanlai in hlui-te pawh a bangte an tichhe bawk a ni," a ti.