Myanmar sorkarin Rohingya-te vote a tihtawpsak

Rohingya Muslim-te vote thlak phalsak an nihna chu duhlohna lantira nawrh huaihawt a nih avangin Myanmar President Thein Sein-a'n a titawp lailawk.

Kum 2010 khan Myanmar-a sipai sorkar chuan an rama Rohingya Muslim, 'white paper' neite vote thlak phalna dan a pass a, he dan hi sorkar chuan a la hman zel avangin Buddisht-te chuan hei hi duh loin lungawi lohna lantir nan kawng an zawh a ni.

Rohingya-te hi Myanmar-ah hian maktaduai khat chuang zet an awm a, mahse sorkar chuan citizen angin a pawm lo a, temporary resident anga chhiar an ni.

Kum 2012 khan Mus­lim leh Buddist-te inkarah hian buaina nasa tak a chhuak a, mi 200 chuangin an thihphah. He buaina hi Rakhine province-a inṭan a ni a, hmundangah kangkaiin ramchhung hmun hrang hrangah sakhaw thila inbeihna a thlen phah a ni.

Myanmar rama Rohingya leh hnam tlem zawkte chu sipai sorkar chuan kum 2010 khan inthlanpuia vote an thlak ve theih nan 'white paper' a siamsak a ni.

Sipai sorkar a tawp hnuah President Thein Sein chuan white-paper neite chu vote an thlak phalsak turin Parliament-ah a lo hmin tawh a, mahse a hnuah a ngaihdan hi a thlak leh a ni.