EU-a tel leh tel lohah Britain mipuiten vote an thlak

European Union-a Britain ram a awm zui zel leh zel loh tura mipui ngaihdan lakna atan nimin khan Britain hmun hrang hrangah vote thlak a ni.

European Union-a Britain ram tel zui zel leh tel tawh loh chungchangah hian nasa takin inhnialna a awm a, a hma aṭangin a duh leh duh lote nasa takin an campaign a ni. EU-a tel zui duh zingah hian British prime minister David Cameron chu a hruaitu ber a ni a, Britain hian EU a chhuahsan a, a hnuchhawn apiangin Europe hian harsatna nasa tak a tawk ṭhin a ni a ti.

Cameron hian Britain-in EU a chhuahsan chuan sum leh paiah buaina nasa tak a thleng thei a ni tih sawiin, hna thawk tam tak tan a hlauhawm thei ang a, hna thawh tur a tlêm phah thei a ni a ti.

EU aṭanga chhuah duhtute chuan Britain-in ni tina £ maktaduai 50 zet Europe-a a pek ṭhin chu British economy siamṭhat nan a hman theih dawn a ni an ti. Hei bakah hian Europe-a raltlan an buaipui mekah, EU an chhuahsan chuan khirh zawkin an rama ratlan lut tur an thunun thei dawn niin an sawi bawk. Britain hmalam hun leh a kal zelna turah EU-a innghat lo a, mahni ngeiin thutlukna siam theih a pawimawh a, chuvang chuan EU hi chhuahsan a ngai a ni tih chu EU chhuahsan duhte campaign au hla pakhat a ni. Chhuansan duhtute lamah Boris Johnson chu huhang ngah berte zinga mi a ni.

EU aṭanga Britain chhuah hi Brexit tia sawi a ni. Britain hian mipui ngaihdan rawn loin kum 1973 khan European Economic Community a zawm a, a hnuah he pawl hi European Union tia thlak a ni. Kum 1975 khan EEC-a tel chhunzawm zel leh zel loh chungchangah mipui ngaihdan lak a ni a, tel chhunzawm zel duhtu an tam zawk a ni. Kum 1990 chho aṭang khan EU-a awm zui zel leh zel loh chungchang hian boruak a nei lian chho ṭan a, hun a kal zel a, nimin khan vote hmangin mipui ngaihdan hi lak a ni ta a ni. Vawiin hian result puan a ni ang.

EU member ram tam tak chuan Britain hi a chhuak ang tih an hlau hle a, mipui duhthlannaa a chhuah chuan, Europe ram dangah a kangkai zel ang tih an hlau a ni. European Union danpui, Treaty on European Union-a Article 50-na chuan EU member ramten an duh a nih chuan EU an chhuahsan theih tih a chuang a ni.