IS firfiakte'n US base awmna Iraq khua an bei

Islamic State (IS) firfiakte chuan Iraq, Arab province-a US sipaite awmna bul khua, al-Baghdadi an bei.

Al-Baghdadi hi US sipai 300 vel awmna, Ain al-Aas base aṭanga km 5 vela hlaa awm a ni. He hmunah hian US sipaite hian Iraq sipaite training an pe a ni.

US sipaite chuan Ningani khan Iraq-a IS hmun pawimawhte chu thlawhtheihna hmangin ṭum eng emaw zat an bei leh tih a sawi a, a bikin Mosul leh Kirkuk khaw bula firfiakte hmun chu an bei nasa zual tih an sawi.

Jordan chuan Iraq nen an inri-na bulah an rama IS firfiak luh tumte dang turin sipai tam zawk a dah. Jordan hian firfiak pawlte'n an ram pilot Moaz al Kassasbeh an halhlum avanga phuba lakna atan ṭum eng emaw zat beihpui a thlak tawh a ni. Jordan lal, King Abdullah II chuan firfiakte hi na taka an beih let tur thu a lo sawi tawh a, ṭum 56 bomb an thlak tawh. Jordan pui tur hian United Arab Emirates chuan F-16 fighter a thawn lut bawk.

IS-te hian Israeli Arab, foreign fighter anga inchhal, Mossad tana enthlak hna thawktu an man tih an sawi. Mahse Israel leh an mi man chhungte chuan hei hi thu dik lo a ni tih sawiin, IS-te hian an ru bo tih an sawi thung.

IS online English magazine Dabig chuan Israeli Arab, kum 19 mi Muhammad Musallam hian Syria rama kalin IS hi a zawm a, a zawm chhan chu firfiak pawl chanchin leh an ralthuam neihte Israel nena a report theihna tur a ni tih a sawi nia tarlan a ni. Mahse East Jerusalem-a a pa chu telephone-a a biak laiin IS commander-te'n ringhlelin an man chhuak ta nia sawi a ni bawk.

Musallam-a pa, Said chuan a fapa chu en­thlatu a nih loh thu a sawi a, Turkey ram tlawha a zin laiin chin hriat lohin a awm a, a hnuah a fapa hian phone-a biain Syria ramah rukbo a nih tih a rawn hrilh a ti. Israel security official chuan Musallam hi nikum October thla khan IS zawm turin Turkey ramah ama duhthu ngeiin a kal tih a sawi bawk.