Ukraine chungchanga inbiaknaah inremna an siam thei ta

Ukraine tualchhung buaina thleng mek chinfel dan ngaihtuaha Russia, Ukraine, France leh Germany ram hruaitute inhmukhawm chuan darkar 16 zet inbiakna an neih hnuah inremna tur an siam thei ta.

Hetihlai hian an inremna siam hi Ukraine aṭanga inlakhran duhtu, an ram khawchhak lama Russia thlawp helpawlte'n an pawm ve thei dawn em tih erawh hriat a la ni lo.

Russia President Vladimir Putin chuan Ukraine khawchhak lamah inkahhai puan an remtih thu sawiin, inremna thuthlung hi Pa­thianni aṭanga hman ṭan tur a ni, a ti. Hei bakah hian inlakkhran duha helte awmna bial tana special status pek remtih a nih bakah, ramri khuahkhirh leh huminatarian chungchangah ruahmanna siam remtih a ni bawk.

Ukraine President Petro Poroshenko chuan inremna an siamah hian khawchhak lam bial tana thuneihna sang zawk pekna a tel lo tih a sawi thung.

Nikum April thla aṭanga inlakhran duhte Ukraine sorkar laka an hel avanga tualchhung buaina thlengah mi 5,300 chuang an thi tawh a ni.