China official-in one-child policy thlak a rawt
China rama family planning official chuan an rama fa pakhat neihna dan kalpui mek chu fa pahnih neih tur tia thlak danglam a rawt.
Shanxi province-a Family Planning Commission deputy director, Mei Zhiqiang chuan an rama mipa leh hmeichhe awmzat inkhairual lo siamṭhatna atan fa pahnih neih ngei ngeina tur dan siam a rawt a, a rawtna hian sawisel a hlawh zui hle.
China sorkar hian an rama mihring pung chak lutuk venna atan kum 1970 kum tawp lam aṭangin family planning policy thar kalpuiin, fa pakhat aia tam neih a khap. He policy kalpui a nih vang hian nau tihtlak luih tir pawh an tam phah hle.
Fa pakhat bak neih phalloh a nih vang hian nupa tam zawkin fanu aiin fapa an duh a, hei vang hian China ramah hian hmeichhe fa an piang tlem sawt a, mipa leh hmeichhe piang inthlauhna hi a sang sawt hle a ni. Nikum chhung khan China rama naupiang ratio chu mipa 116-ah hmeichhia 100 zel piang ang a ni a, ram pum mipui sex ratio chu mipa 105 ah hmeichhia 100 a ni.
National Bureau of Statistics-in a tarlan danin kum 2014 kumtawpa China mipui awm zat chu tluklehdingawn 1.37 a ni a, kum 2013 aia an punna hi maktaduai 7.1 a tling.