EU atangin Britain a inla hrang dawn ta. British PM Cameron-a'n banna a thehlut
Britain-in European Union-a awm zui zel leh awm zui zel loh thua mipuiin vote an thlak chu nimin khan tihchhuah a ni a, Britain mipui tam zawkin EU chhuahsan an duh. Hemi kal zelah, nimin khan British prime minister David Cameron chuan banna a thehlut.
Brexit vote thlakah hian vote 33,551,983 a tla a, za zela 52 chuan EU aṭanga chhuah an duh a, a dang zawngin EU-a awm zui zel an duh thung. EU chhuahsan duh lama vote tla hi 17,410,742 a ni a, a duh lo lamah hian vote 16,141,241 a tla thung.
Britain huam chhungah Wales leh England-ah te Europe-a awm zui duh tawh lo, chhuahsan duh an tam zawk laiin, Scotland leh Northern Ireland-ah te chuan EU-a awm zui zel duh hi an tam zawk a ni. England huam chhung bikah, London khawpuiah chuan EU-a awm zui zel duh an tam zawk.
He referendum hian Britain kal zelna turah nghawng a nei lian nghal hle. EU-a member nih duh lo, UK Independence Party-a an hruaitu Nigel Farage chuan hetianga result hriat chian a nih chuan David Cameron hi a nihna aṭanga a inhnuhdawk nghal a ngai a ni a ti a, a tih ang leh, Cameron-a'n thuthlukna a siam angin nimin khan British prime minister a nihna
aṭangin inhnukdawk turin banna a thehlut.
EU aṭanga Britain inlak chhuah duh an tam zawk tak avang hian khawvelah nghawng lian tak a nei dawn a ni. Australia prime minister Malcolm Turnbull chuan khawvel pumah nghawng a nei dawn tih a sawi a, Britain chu an thurualpui leh an ṭhian
ṭha a ni a, chuvang chuan EU-a a awm zui zel an duh a ni a ti. Britain-a hetiang inthlan an buatsaih hian European Union member ram dangte a nghawng hle. France-a far-right hruaitu Marine Le Pen chuan hetiang referendum hi France-ah pawh buatsaih ngei a ṭul a ni a ti.
Sum leh pai lamah pawh nghawng a nei chho rih mek a, British Pound Sterling hlutna a tlahniam a, Euro hlutna pawh 3%-in a tlahniam nghal bawk. Hei bakah International market-ah European share chu za zela 6 aṭanga 7.5-in a tlahniam tel a ni.
Hei baka a nghawng lian awm thei chu United Kingdom pumkhatna a ni. Scotland hian kum 2013 khan UK aṭanga inlakhran leh lakhran lohah vote hmangin ngaihdan an lo la tawh a, chutah chuan a tam zawkin UK-a awm zui zel an duh a; tuna EU-a awm leh awm lohah hian Scotland mipui tam zawkin EU-a awm an duh a, an awm zui zel theih nan chuan UK
aṭanga inlakhran a ngai dawn a ni. Hetiang bawk hian Northern Ireland-ah EU-a awm zui zel duh an tam zawk. Irish party lian ber hruaitute zinga mi Sinn Fein chuan tuna an result hian United Kingdom pumkhatna a tiderthawng dawn hle tih a sawi a, Irish mipui tam ber chuan EU-a awm zui zel an duh dawn chuan UK an chhuahsan a ngai dawn a ni tiin, UK-a awm zui zel leh zel loh chungchangah Northern Ireland-ah hian vote hmanga tihchian thuai a phut.
David Cameron-a'n banna a thehlut bang
Britain-in EU chhuahsan a thlan hnuah, nimin khan British prime minister David Cameron chuan a bânna a thehlut.
Cameron chuan democratic dan anga mipuite duhthlanna chu a pawm tih sawiin, Brussel kaihhruaina pawn lama hma lam pana Britain kalpui chu a thei lo tih sawiin, a banna hi a thehlut a ni. Cameron chuan kum ruk chhung British prime minister ni chunga a ram rawng a bawl thei chu inchhuanthlak hlea a hriat thu a sawi bawk.
British PM chuan Downing Street-ah, mipui hriatah a banna thehluh thu hi puang chhuakin, "EU hnuaiah Britain chu a chak zawkin, a him zawk a, chuvang chuan EU a zawm hi a ngai a ni tih keimahah chuan a chiang a ni," tiin, "Mahse British mipuiten kawng dang zawk zawh turin duh an thlang ta zawk a, chuvang chuan he ram hian hruaitu thar, hemi kawnga hruai theitu tur a mamawh a ni," a ti. Cameron hian lalnu Elizabeth-i pawh nimin zing khan a ban tur chungchang hi a sawipui tawh thu a sawi.
"Europe chhuahsan hi ka thlawp ngai lo tih inhria a, chutihrual chuan he ram hian chakna ropui tak a nei a ni. A hmaa ka lo sawi tawh angin EU tel lo pawhin Britain hi a lo ding tawh ṭhin a, EU tel loa din zel dan kawng kan ngaihtuah a ngai dawn a ni. Tunah chuan EU chhuahsan turin thuthlukna kan siam tawh a, chuvang chuan kawng ṭha ber kan zawn a ngai ang. Ṭangkai theihna ka neih phawt chuan ka theihtawp ka chhuah zel ang," a ti.
David William Donald Cameron hi kum 1966 October 9-a piang a ni a, Conservative Party hruaitu niin, kum 2010 khan prime minister a ni ṭan a, kum 2015-a inthlanah khan an thlang tling leh a ni.