Venezuela President inthlanah Maduro-a'n hnehna a chang

Venezuela mipuite chuan an President tur Pathianni khan thlangin, zanlai pelh hretah president nilai mek Nicolas Maduro chuan hnehna a chang tih National Electoral Council chuan a puang. Maduro hian a ṭum thum nan Venezuela President dinhmun a chelh leh dawn a ni.

National Electoral Council (NEC) chuan Maduro hian vote tla aṭanga 51% hmuin, a khingpui Edmundo González chuan 44% a hmu tih an tarlang.

Hetih lai hian inthlan result hi eptu lam chuan an pawm thei loa, result chhiar a nih danah thi thil fel lo a awm niin an sawi. Eptu lam chuan NEC hi Maduro lamṭangte thuhnuaia awm a ni tiin rampuma vote tla zat chipchiar takin an tarlang nghal mai lo tih an sawi a, vote tlak dan dik taka tarlan a nih loh avangin inthlan result hi rin harsa an ti hle.

Venezuela ram chhung bakah khawvel ram dang hruaitute pawhin inthlan result hi pawm harsa an tih thu an sawi ve bawk. Chile left front hruaitu, Gabriel Boric chuan, "Inthlan result hi awih har tak a ni tih Maduro sorkar hian a hriat a ngai" a ti. U.S. Secretary of State Antony Blinken pawhin Venezuela inthlan result tihchhuah dan chu a ngaihṭhatthlak loh tih sawiin, mipuite duhdan leh an vote tlate chu inthlan result nen a inpersan hle niin a sawi.

Maduro chuan an ram inthlan kalphung chu an hmelma, ram dangte chuan rawn tihbuai an tum niin a puh thung. " Tun hi kan ram boruak muanawm tak tih chhiat an tum ṭum khatna a ni lo," tiin Presidential palace-a a chak lawma pungkhawm, amah thlawptute hmaa thu a sawinaah a sawilang a ni. Venezuela rama buaina chawh chhuah tumte chu an chungah rorelna lek kawh a ni dawn tiin a sawi bawk.