Typhoon Gaemi chhiatna thlen vangin China-ah mi 15 thi

Chinese state media chuan thuchhuah siamin China chhim chhak lamah thlipui ken tel ruah sur nasa tak chuan leimin thlenin kar liam ta Inrinni khan mi 15 chilh hlum a ni tih an tarlang.

Gaemi thlipui hian China a thlen hma in Philippines leh Taiwan nuai hmasain chhiatna a thlen ve bawk. Philippines-ah hian mi 34 nunna chan awmin Taiwan-ah hian mi 10 an thi tawh tih tarlan a ni a, thil a tihchhiat hlut zawng hi USD mtd 54.9 hu nia chhut a ni. Hemi hnu hian China lamah thlipui hi inher chhoin ruah tam tak a ken tel chuan chhiatna hrang hrang a thlen ta a ni. Leimin vanga mi 15 thihna hi Hunan province niin darkar 24 chhungin ruah, 30 cm a tla nia tarlan a ni.

China chhunga province dangte pawhin thlipui leh ruah vang hian harsatna an tawk ve bawk. Linjiang khua, Jilin province-ah chuan Yalu lui a len mai a hlauhawm avangin khaw chhunga chengte zinga in chhawng thumna hnuai lamah awmte chu hmun sang lama insawn tura hriattir an ni. Liaoning province-a chemical leh mining company-te chuan July 27 aṭang khan chhiatna lian zawk a thlen loh nan hna thawh an titawp hrih a ni. He province-a cheng mi 30,000 chuang chu hmun him lama thiar chhuah an ni tawh bawk.