Israel minister-ten Hezbollah bei let turin PM Netanyahu thuneihna pe

Israel security cabinet chuan an ram prime minister, Benjamin Netanyahu leh a defence minister, Yoav Gallant chu Lebanon helpawl, Hezbollah in rocket hmanga Israel a beihna chhan letna kawngah, an duh hun leh an duh anga che turin thuneihna an pe.

Kar liam ta Inrinni khan Israel ram luah, Golan Height chu rocket hmanga kah a ni a, Druze khuaa Israel mi 12 thiin naupang leh tleirawlte an ni. Hei hi thla eng emaw zat hnua Israel leh Lebanon ramri kaltlanga inbeihna thlenga ṭum khatna thihna thlen tam ber ṭum a ni. Rocket hi Hezbollah pawl kah niin, Israel rocket-in Lebanon ram a kaha mi pathumin nunna an chan avanga an chhan letna niin an sawi.

Hetih lai hian khawthlang ramte chuan Israel chu inbengdai turin an ngen a, White House chuan Druze khua beih anih hnuah Israel leh Lebanon lam pawh inbiakna a neihpui reng niin a sawi. Ram pahnihte inrinaa inbeihna thlengte tihtawp a nih a, inbiakna hmanga chinfel dan kawng ngaihtuahin hma a la mek tih a tarlang.

Israel chuan Hezbollah beihna hi an chhang let ngei dawn tih an lo sawi tawh thung a, nimin zing khan ramri aṭanga km 6.5 vela hlaa awm, Lebanon khua Shaqra chu drone hmangin a bei a, mi pahnih an thi niin Lebanon media lam chuan an tarlang a, mahse Israel lamin sawi an nei lo thung.