Nigeria President-in US puihna a dil
Nigeria President Goodluck Jonathan chuan an rama helpawl, Boko Haram-te an beih letnaah US puihna a dil.
Boko Haram-te hian an ram inthlanpui neih tur chu an boycott dawn tih Inrinni khan an sawi a, hemi ni vek hian an ram hmarchhak lama Gomber khua beiin mipuite hnenah inthlana tel lo tura hriattirna lehkhate an thehdarh bawk. Helhoin an beih avang hian khawchhung mi tam tak chu hmun him lamah an tlanchhia.
Wall Street Journal-in a kawmnaah, President Jonathan chuan, "IS firfiakte bei turin US-in a sipaite a tir a, Nigeria ramah pawh an lo kal thei lo em ni?" a ti. US chu Nigeria ram ṭhianṭha tak a ni a, harsatna an neih chuan anmahni pui tura an lo kal a beisei thu a sawi bawk.
Mahse Pentagon thupuangtu, Rear Admiral John Kirby chuan Nigeria rama US sipai thawn tumna mai a awm lo tih a sawi thung. "Nigeria ramah hian US sipai dah an awm lo a, thawn luh tumna pawh a awm rih lo," a ti.
Boko Haram hian Nigeria hmarchhak bialah Islamic state din tumin hun rei tak an bei tawh a, Nigeria ram chhung bakah an ṭhenawm Chad ramah pawh an inzarpharh tawh bawk. Hei bakah hian ramri bul, Cameroon hmarlam an bei fo bawk. An pawikhawihna avang hian ram pathumte hian ramri-ah sipaite an dah tawh a ni.
Jonathan leh a kaihhruai sorkar chuan Boko Haram hi 'Africa khawthlang lama al-Qaida pawl' tiin an vuah a, rampawn lam aṭangin puihna an dawng ṭhin tih an sawi. Kum 2009-a sorkar laka an hel aṭangin Boko Haram-te pawikhawihna avang hian mi 13,000 vel an thi tawh a, mi maktaduai khat chuang chu an in leh lo tlansanin hmun him lamah an tlanchhe tawh bawk.