US-in Kuwait-ah sipai a thawn
US President Barack Obama-a'n Congress hnenah Islamic State firfiakte laka bithliah chin awm loa beihpui thlak phalsak tura a dil hnuah, US sipai 4,000 chuang chu Kuwait ramah thawn luh an ni.
Obama chuan Iraq leh Afghanistan rama firfiakte laka khawmual sipaite'n beihpui an thlak ang kha chu kalpui an tum lo tih a sawi a, mahse hemi rual hian kum thum chhung chu IS firfiakte bei tura sipaite a ṭul dan anga hman phalsak turin Congress-ah a lo dil tawh a ni.
Kum 2011-a Iraq war a zawh hnuah khan US Army hian Kuwait-ah brigade a neih chhunzawm a, he hmunah hian US sipaite chuan Middle East-a sipaite chu training an pe ṭhin.
Tun ṭuma sipai thawn luhte hi Fort Carson, Colorado-a combat team te an ni a, anni hian IS laka beihpui thlaktu, US kaihhruai ṭangrual pawla tel ram ṭhenkhat sipaite training an pe dawn a, an zingah hian Jordan leh UAE sipaite pawh an tel ang. US sipaite hi an thawk rip hle a, tank leh Bradely Fighting Vehicle-te keng telin, sipai zinga tam tak chu Iraq indonaa lo tel tawhte an ni.