Ukraine-ah inkahhai hman ṭan a ni

Ukraine tual­chhung buaina tihreh a nih theihna atana kar hmasaa Ukraine, Russia, Germany leh France ram hruaitute'n inkahhai puang tura inremna an lo siam chu nimin aṭang khan hman ṭan a ni.

Ukraine President Petro Poroshenko chuan Inrinni zan zanlai aṭang khan inkahhai hi hmang ṭan turin sipaite a hriat­tir a, nimin khan buai thlenna, Ukraine khawchhak lam bialah sorkar laka helte leh sipaite inkap thawm hriat a ni lo.

Hetihlai hian President Poroshenko chuan inremna hman ṭan a nih hma hian Russia chuan helpawlte hi ram lak belh turin na takin a nawr tiin a puh. Inremna hman a nih hma hian Debaltseve khuaah helpawl leh sipaite hi an inkap nasa hle tiin regional police hotu, Vyacheslav Abroskin chuan a sawi bawk.

Donetsk biala helpawl hotu, Alexander Zakharchenko chuan inremna hi zah turin a mi leh sate chu a hrilh a, hemi rual hian inremna bawhchhe zawnga beitu an awm a nih chuan na taka chhanglet nghal tur­in a hrilh bawk.